الظاهر أن الحياة ما وقفتش
طلع بعدك في حياة
وفي حاجات انا نسيتها
حاجات فيا في قربك
نسيت اني حبيتها
في بُعدك
طلع بعدك في 100 واحدة
بيتمنو سلام بالإيد
بيتمنو ولو ضحكة
ولو حتى اني أسهر يوم
اقول كام كلمة وياهم
عرفت ساعتها اني بنيت
على كام خشبة مكسورة
وكام طوبة ماسكها الماضي
مافلتهاش
فكان لازم هيجي اليوم
اقع وانهد اروح إنعاش
شحتنا الاهتمام ياعم
شحتنا القرب
شحتنا الحب
عارف ياعم
والله كان لازم هيجي اليوم
نقع براحة من غير صوت
ما نعرف حتى نطلع عون
ما نعرف حتى ننجى
باللي باقي مننا
كنا اغلى من كدا
كنا حاجة كبيرة جدا
بس باردو
حضرت يوم
نورك المطفي غادرني
حبك الساكن في روحي غار في داهية
انما دي غريبة جدا
يعني كلمة حب ما اتخلقتش ليكي !!
ايوا غادرت الشمس اللي تعمي
وجيه القمر نور حياتي
كنت بقتل نفسي بيكي
وهي جات تلحق بقيتي
وتنجى بيا للحياة
يااااه انما كنت اعمى فعلا
بس جيه الوقت اني افوق
امشي شامخ راسي فوق
ربنا شاء اني افوق
ابقا جاهز للحياة مرة تانية
واكتشفت أنه
عشان تنسى واحدة
فلازم تمر بعديها بواحدة
تنام قبل واحدة
وتفتكر أن حياتك دي
يادوب مرة واحدة
تسيب كل وِحدة
تعود مرة واحدة
تعيش الحياة
عرفت أن بكرا
مصيره بكلمة
يادوب كلمة واحدة
هقولها في وشك
وهرجع اعيش
هقولك
"سلام"
