مليش غيرك سند
ومليش غيرك ونيس
وأن ضلت يوم خطاي
بصرخ إليك وأستغيث
وبعلو صوتي أندهلك
وبطيبة قلبك تسمعني
ومهما أجري واتجاهلك
لساك بتقولي يا أبني
الحمل زاد عليا
والامل ضاع ف عينيا
ومفيش قلب أشكيله
ويقدر فعلاً يحس بيا
شكوتي حطيتها في ايدك
ومستني منك رد
ده أنت الوحيد اللي اجري منه
ولو رجعت ملقاش صد
وحشني حضنك جداً
ووحشني الكلام معاك
وازاي يكونلي غيرك
وأنا أصلاً ما لي سواك
حوط عليا بايدك
واشفي جروح روحي
واطرح عني مرض الخطية
وحررني وقولها روحي
ومانيش طالب خروف
او خاتم وقميص جديد
أنا كل اللي بطلبه
تعاملني ولو واحد م العبيد
العبد في قربك
بيصير أمير
والغني بعيد عنك
بيصير ذليل
والسامرية لو معاك تبقى مبشرة
والعشار يبقى صاحب خير
ازاي أبقى محتاج طيبة
وأروح أمد إيدي للغير؟؟
والخير والطيبة
عندك من غير حساب
تدي لكل واحد
يجي ويدق الباب
واديني واقف مستني
تفتحلي وتديني من خيرك
ده أنت بترسل عمود نور
يرشدني حتى في ليلك
وانا طالب بس دوا
ولمسة من يدك
صدقني أتالمت كتير
من ساعة ما جريت وعاندتك
