يا القُرّة،

عْييت من شدّان الجُرّة

خْطرتش في بالك مَرّة ؟

حياه مُرّة…

هُنت عْليك وليّة

و نتبرّا،

من عقلي كان تْخلّى

عْلى هْواك و نصنع فَلّة

في الواد نْحل ثْنيّة

نا المِبلِيّه

جْفوني طابوا من دمعاتي، و قلبي خْفق بين يْديّا

نْنادي النّجمة كيف تْواتي، و كواكب الكون جِملِيّه

في الصُّرة زادي و زُوّادي، نْشد رْحالي في لْياليّا

نكتب باللّيعة كليماتي، و نختِم بْممّو عينيّا

تِخمد ناري ماذابيّا

يا نِسمة هَبِّتْ في وْريدة

سلبِتها وْريقة بوريقة

مركونة من غِير تحريكة

بْعيدة ع الخاطر مرميّة

و أنا الّي فيبالي عْنيدة

و اغصاني مع الرّيح سْديدة

تِتركت بْغُصّة و تنهيدة

و بقيت وحيدة مِنسيّة

جفوني طابوا من دمعاتي، و قلبي خْفق بين يديّا

ننادي النّجمة كيف تْواتي، و كْواكب الكون جِمليّة

في الصُّرّة زادي و زّوّادي، نْشد رْحالي في لْياليّا

نرسِل بأحزاني جْواباتي، نوصفلك ما جرى عْليّا

تِخمد ناري ماذابيّا

ماذا بيّا؟

ماذا بيّا؟