الشتاء فصل الحنين اللي شعم فالجوف ناره

بارك الله فالضلوع اللي تزوده من حطبها

الغرام اللي ما كان بكيف قلبي واختياره

سطوته مثل الشجاع اللي غزّا القوم وغلبها

اثر قلبي كل ما زاد الغلا زاد انكساره

طاح بيدين الغرام الطيحه اللي ما حسبها

المحبه تهدم الرجال وتزيد انهياره

غلطةٍ لو عاد فيّ الوقت والله لا ارتكبها

ما يداوي كسرة الخاطر طبيب ولا جباره

غير ظبيٍ كل عذبات القصايد من سببها

والله ان وصالها حالي وفرقاها مراره

ما يتوب اللي تذوق توتها ولا عنبها

الجمال اللي جمع بين البداوه والحضاره

صبّه الله ، والله اللي في مفاتنها وهبها

العيون تشن غاره والرموش تشن غاره

وان تفاديت العيون الموت من طعنة هدبها

والجبين اللي فهق ليله وبكر في نهاره

والشفاه اللي يذوب القلب من لاضي لهبها

والمعنق يّخلف العساس ويضيع مساره

يابري حالي ليا من عانقه صافي ذهبها

ماخذه على ربيبات الحسن عرش الصداره

لين سموها رعابيب النساء فتنة عربها

فيك من لطف الفقير وفيك من طبع الإماره

يالهنوف اللي يعزّز زينها قوة نسبها

من يبشرني بملقاها ويبشر فالبشاره

السهر والف عيوني من كثر ما ترتقبها

جعلها من دورة الايام والدنيا مجاره

وجعلني ما اشوف فيها حزنها ولا تعبها

عاضني ربي على الصبر وعلى كبر الخساره

صدفةٍ ما كنت حاسبها لكّن الله كتبها