شيء مش مفهوم صداع في دماغي طول اليوم
كتر التفكير إزاي الضغط علينا كتير
ليه مش عارفين نمشي في شارع مش خايفين
و المعاكسات مالية الطرق و الميادين
فين أيام زمان الشهامة راحت فين
كان فيه احترام بين البني ادمين
دايما بيقولوا علينا إن احنا الغلطانين
ده اللي بيحصل شايفينه وساكتين
كل اتوبيس ..كل شارع .. في الجامعة وفي التليفون
في ناس كتير بتعاكس .. الواحد مصدوم
أطفال بتعاكس في السينمات .. و الشارع وقت الاعياد
ويقولوا للبنات
"اوه يا جميل أنا مش بعاكس"
عندي عربية وشقة وجاهز
ليه في أي مكان بنمشي فيه بنسمع في كلام؟
و مفيش أمان ياريتنا نرجع زي زمان
كل البنات حتي اللي لابسين عبايات
فين القانون علشان يجيب حق البنات
و لما الناس يتلموا يتقال "معلش خلاص"
"ما كفاية بلاش فضايح ليه تلموا عليكوا الناس"!
لما نروح القسم نبلغ ونقول محناش ساكتين
الناس يقولولنا احنا مش شاهدين
دايما بنلاقي تبرير من الصغير للكبير
و نشوف العيب و نسكت راح فين الضمير
من قبل ما يعرفوا حصل إيه يسألوا كانت لابسة إيه
ويلوموا علينا كتير
ليييييه !!
راضييين ده يحصل فينا؟
ليه يجيبوا الغلط علينا ؟
ليه محدش حاسس بينا ؟
مهما اتكلمنا واشتكينا
متحسيش إن العيب فيكي
لبسك شكلك و كلامك دي حاجة ترجع ليكي
متخليش حد يلوم عليكي
واكيد في يوم هيحصل تغيير
مش عايزة أرجع اسكت تاني
مش هفضل خايفة طول حياتي
مش عايزة افكر واشغل بالي
ولا يجي حد يقولي عادي
مش عايزة اخاف تاني !
