اوجاع بتزيد وتفيض
والروح جوا وجع محبوسة
والحزن عامل لي حصار
كأن خططه عليا مدروسة
مبقتش شايف أمل
ولا أي نور جوايا
بقيت بخاف صورتي
لو المحها في مرايا
واخاف وجعي يبان
أو خوفي يظهر عليا
واقول لقلبي خبي
فيبان حزني في عينيا
ويفضحني يأسي ووجعي
مع أول يدوب سطرين
واحاول اجمع كلامي
فاسكت من أول كلمتين
وتبدأ عينيا في دموع
نهر ملهوش ابداً سد
وابكي زي رضيع
ماتت امه وملهوش حد!
واستنى ايدك تيجيني
واحس أنك بتتصرف
أنا خايف عقلي من الخوف
يشت مني ويخرف
اتدخل علشاني بسرعة
واتصرف يارب علطول
جربت كل الحلول
ولا حل له مفعول!
الدنيا ضلمة جوايا
لكن انت تقدر تنورها
ومن ميلها في حزنها
تقدر تعليها وترفعها
وتغير تفاصيل كتيرة
وتخلق تفاصيل تانية
الحزن عشش كتير
والفرح بيروح في ثانية
فعلشاني فعلاً اتصرف
وارفعني من يأسي
وتخلي قلبي يشهدلك
وتهتف لك بالغنا نفسي
